31.08.2017 Čáhkáljávrris lagasvánddardanbáiki

Gilbbesjávrri lagasguovllus lea Čáhkáljávri, man áigot ráhkadit lagasvánddardan- ja luondduturismabáikin Leader-prošeavttas, EU dálonguovlofoandda doarjagiin. Prošeavttas ollašuhttet plánaid divvut bálgá giliguovddáža ja Čáhkáljávrri gaskkas, ja hukset vánddardeami ja luondduturismma várás ráhkadusaid Čáhkáljávrri lulágeahčai.
Prošeavttas vástida Gilbbesjávrri fitnodateaiggádiid ja doarjjalahtuid oktasaš searvi Kilpisjärven Ladut ry. Meahcceráđđehusa Luonddubálvalusat lea dorjon prošeavtta johtui bidjama ja ollašuhttá plánejuvvon geinnodagain luonddu- ja kulturárbečielggademiid ja lea veahkehan čállit prošeaktaohcamuša.
Kilpisjärven Latu-prošeavttas vástideaddji Pete Pettissalo mielde lassánan jearaldagaid ektui guovllu lagasvánddardeapme- ja luondduturismabálvalusat leat ovdánan njozet, mii lea maid veahá caggan luondduturismma ovdáneami. Ovdamearkka dihte giliguovddáža lahka leat unnán dakkár heivvolaš vánddardanbáikkit, mat heivejit buohkaide. Lassánan jearaldagat stivrejuvvon luonddus vánddardeapmái dárbbaša doarjjan maid huksehusaid, vai vánddardeddjiide sáhttá fállat bálvalusaid meahcis. Dál ollašuvvan geinnodagat dahket vejolažžan ordnet skábman earret eará ”guovssahasmátkkiid” giliguovddáža bálvalusaid lahka.
Maiddái vejolašvuođat oanehet meahccesihkkelmátkkiid lágideapmái buorránit. Čáhkáljávrris lea boahtteáiggis vejolaš ovdamearkka dihte doallat kafea. Kilpisjärven Ladut ry lea searvi, man ulbmi ii leat dinet, muhto lea fuolahan Gilbbesjávrri čuoiganláhtuin juo badjel 20 jagi áigge. Čáhkáljávrái ceggejuvvojit huksehusat, fitnodatstohpu ja goahti, ja maid juohkeolbmogeavahussii oaivvilduvvon goavdi, muorravisti ja goikehivsset, maid searvi doallá ortnegis.
– Fitnodatbáikkis bearrat geavahanmávssu maiguin ordnet maid oktasaš atnui Čáhkáljávri boahtti huksehusaid boaldinmuoraid ja bázahusfuolahusa, Pettissalo muitala. Pettissalo mielde prošeavttas leat positiiva váikkuhusat gili olbmuid lagasguovllus lihkadanvejolašvuođaide ja maid guovllu ekonomiijai.
– Go mátkkošteaddjit orrot lahka turistaguovddáža, atnet sii maid gili bálvalusaid. Huksejuvvon geinnodagat ja fuolahuvvon huksehusat lahka turistaguovddáža čohkkejit luonddus vánddardeami nu, ahte dat unnidit vejolaš hehttehusaid maid lassánan turisma lea dagahan lundui ja eará ealáhusaide. Turismma bistevaš lassáneami dorvvasteapmi leage okta prošeavtta ulbmiliin, Pettissalo jurddašallá.