20.12.2017 Eanodat oažžu bealljemerke- juvvon bolespatrullaid – bargosadjin Muoná

Go Duottar-Lappi bolesiid resurssat mannet čuoiganguovddážiid ortnetrihkkosiid čielggadeapmái, de das gillájit eanodatlaččat go dáppe eai leat bolesat. Boahtte jagi álggos Eanodaga ealáhahkii báhcci bolesiid virggit sirdojuvvojit dál deavdin ládje Muonái. Lappi boleshoavdda Esa Heikkisa mielde ášši lea gieđahallojuvvon Lappi politiija mearrádusdahkanvuogádagas loahpalaš hápmái. Boleshoavda Heikkinen, manne Eanodaga boleskantuvrii eai virgáduvvo olbmot, vaikko ieš kantuvra seailu?
– Hui stuora oassi Duottar-Lappi bolesbargguin dáhpáhuvvá Gihttela gielddas. Stuorámus dárbu livččii lean Gihttela bolesstašuvnna nannen, gos mii šaddat fuolahit fáhkkadáhpáhusaid lassin gitta váldojuvvon olbmuid goziheamis. Mii dagaimet de kompromissa, dannego Muonás mii bastit bálvalit buorebut olles Duottar-Lappi guovllu. Dáinna čovdosiin dorvvastit buorebut Eanodaga bálvalusaid.
Heikkisa mielas váldodeaddu bolespatrullaid bargguin lea Gihttela lassin Kolari-Muoná-guovllus.
Sesoŋŋaáigge Levi orrunsajit ja restauráŋŋat leat dievva lullisuopmelaš turisttain. Bolesiid resurssat gullet stuorámus osiin gárrenolbmuid fievrrideapmái ja gittaváldimii. Iigo sin goziheami, geaid bolesat šaddet váldet gitta ja doalvut omd. idjii giddagassii, sáhtáše ordnet eará ládje ovdamearkka dihte muhtin fáktenfitnodaga bokte?
– Dat ii leat dađi bahábut vejolaš, dannego almmolaš válddi sáhttá geavahit dušše virgeolmmoš.
Maiddái Eanodagas leat turisttat. Giđđat lea alimus skohtersesoŋŋa, goas lea dárbu bolesiidda eambbo go dábálaččat. Leago dát váldon vuhtii das, go leat plánen bolespatrullaid sajádagaid?
– Gal dát lea oppalaččat árvvoštallojuvvon, giđđat Duottar-Lappi lea min váldoguovlu ja mii diehtit makkár váttisvuođat Gilbbesjávrri guovllus leat badjelmeare skohtervuodjimiid geažil.
Heikkinen fuomášuhttá, ahte resurssaid juogedettiin boleslágádusaid gaskkas Lappi earenoamáš dilit eai leat váikkuhan mearreruđaid juohkimii.
– Buot earenoamáš dárbbut šaddet ruhtaduvvot ja ordnejuvvot min iežamet ruhtadanrámmaid siskkobealde.
Heikkisa mielde Eanodaga guovllus vástidit Muonái biddjon bolesat, geat doibmet nu daddjojuvvon bealljemerkejuvvon bolespatrullan Eanodaga gieldda guvlui.
– Mii galgat atnit muittus, ahte Eanodagas dál doaibman politiijat eaba leat sáhttán leat nu gohčoduvvon Eanodaga politiijat, dannego sudno doaibmaguovlun lea leamaš olles Duottar-Lappi guovlu, mas barggut leat deattuhuvvon eará sadjái go Eanodahkii.
Manne dáinna vuogádagain ii sáhte joatkit? Manne Eanodahkii eai sáhte bidjat bolesiid, geat dárbbu mielde barget maid eará sajis Duottar-Lappis?
– Dannego váldodeaddu bargguin lea eará sajis go Eanodagas. Resurssa geahččalit bidjat nu, ahte dat livččii nu lahka go vejolaš doppe gos leat fáhkkadáhpáhusat ja -barggut. Šaddetgo politiijat maŋŋel Jari Kaipaisa ja Olavi Airaksisa ealáhahkii mannama oaidnemeahttumin Eanodagas, politiijahoavda Heikkinen, vai galgetgo dat politiijat, geat leat biddjon Muonái, jeavddalaččat patrulleret maid Eanodagas?
– Dan mii eat leat vel plánen nu detáljjaid mielde, muhto dán bargui áigot laktit vel johtolatpolitiijaid mielde, dannego VT21 lea earenoamážit dálvet leamaš váttes geaidnogaska.