12.01.2018 Gávcci geatkái báhčinlohpi

Eanan- ja meahccedoalloministeriija addá lobi báhčit gávcci geatkki meahcástusa spiehkastanlobiin Davve- ja nuortaboazodoalloguovllus. Geatkki nálledikšunplánas leat golbma nálledikšunguovllu: Davve- ja nuortaboazodoalloguovllut; eará boazodoalloguovllut ja Vuovde-Suopma. Getkkiid ráddjejuvvon bivdolohpi addojuvvo jus geatkkit leat goddán bohccuid dan guovllus guokte jagi maŋŋálaga. Ásahus lea boahtán fápmui ovddit beaivve.
Luondduriggodatguovddáža mannan jagi árvvoštallama mielde Suomas leat sullii 220–250 geatkki. Geatkenálli lea lassánan máŋggageardásaččat mannan 15-20 jagi áigge. Geatkkit ellet váldoosiin davvin davi duottarguovlluin ja nuortan meahcceguovlluin. Eanodaga, Anára ja Ohcejoga guovlluin árvvoštallet leat 40-60 geatkki, mat gullet Davviriikkaid oktasaš geatkepopulašuvdnii, mas leat badjel 800 geatkki.
Boraspiriid gaskkas lea geatki, mii dagaha eanemus vahágiid boazodollui. Geatkki goddán bohccuid leat dieđihan mannan jagi loahpas juo 2893, mii lea sullii 100 eambbo go diibmá. Geatkki dagahan vahágat leat sullii 6,6 miljovnna evrro, mii lea eambbo go gumppe, guovžža ja albasa dahkan vahágat boazodollui oktiibuot.
Sihke Ruoŧŧa ja Norga bivdet getkkiid unnidan dihte vahágiid, maid dat dahket sihke sávza- ja boazodollui. Suomas giđđadálvve 2017 bivde čieža boazodoalloguovllu davit osiin Suoma fuođđoguovddáža spiehkastanlobiin oktiibuot gávcci geatkki.