Gielddaráđđehus evttoha stivrii, ahte Eanodaga gielda máksá ruovttusdikšundoarjaga gieldda lasáhusa 150 evrro vuollel golmmajahkásaš mánás, gii gullá ruovttusdikšunbiirii, ja 50 evrro nuppi mánás. Virpi Väisänen dagai golggotmánu stivračoahkkimis álgaga, mas evttohii ahte Eanodaga gielddas álggáše máksit lága njuolggadusaid mielde máná ruovttodikšundoarjagii gielddalasáhusa.  Álgaga mielde gielddalasáhus veahkehivččii máŋga bearraša, geat gullet ruovttusdikšundoarjaga biirii, ekonomalaš dili ja maiddái dagašii vejolažžan vánhemiidda váldit guhkit dikšunfriddja.  Lassin dasa vuollel golmmajahkásaččaid dikšu gáibidivččii eambbo bargiid dikšunbáikkiin. Gielddalasáhusa máksin vejolaččat unnidivččii vuollel golmmajahkásaš mánáid dikšundárbbu Eanodagas. Árrabajásgeassinbagadalli Taina Ketola lea čielggadan, ahte jus Eanodaga gielda mávssášii ruovttus dikšundoarjaga gielddalasáhusa nu, ahte ruovttus dikšundoarjaga biires vuollel golmmajahkásaš mánás mávssáše gielddalasáhusa 150 evrro ja nuppi mánás 50 evrro, de dát dagahivččii gildii jahkásaš goluid sullii 22 000 evrro. Leat árvalan seastit sullii gaskkal 9000-30 000 evrro, jus gieldda mánáidgárddi mánáid divššoše ruovttus gielddalasáhusa máksima boađusin. Ruovttusdikšundoarjaga gielddalasáhusa juolludeamis boahtá vástidit čuvgehusdoaibma.