Enontekiön Sanomat-áviissa geasi govvengilvu lea dál nohkan. Doaimmahusa jury válljii 154 gova joavkkus logi gova, mat ledje sin mielas dat buot buoremus govat. Jury mielas juohke govva mii sáddejuvvui gilvui, lei iešalddes fiinnis, muhto dat  govat, mat guoskkahedje jury eanemusat, sierranedje joavkkus oalle álkit. Boddu, mii govvii lei darvvihuvvon, ja dan atmosfeara, ledje dehálaččat, muhto jury giddii fuomášumi maiddái gova visuálalašvuhtii ja ivnniide.  
Govvideaddji Tapio Huttusa bargun lei almmuhit gilvvu golbma buoremusa. Huttunen muitalage, ahte vuoitogova lei álki gávdnat muhto silba- ja bronsasajiid šattai veaháš smiehttat. Okta duopmáriid kriterain leige báikkálašvuohta, danne vaikko buot govat ledje sihkkarit váldon Eanodagas, nugo galggai njuolggadusaid mielde dahkatge, de buot govain ii goittotge boahtán dat nu čielgasit ovdan.
Gilvvu vuoiti lea Marja Vanhapiha earenoamáš guoskkaheaddji govva Mihkkal-Máhte čáhceviežžanmátkkis. Kamera vurkii dan fiinna bottoža Bievrrašjávrris miessemearkuma áigge.
– Moai vulggiime Mihkkal-Máhtiin iđđesárrat viežžat čázi jogas, gosa lei oalle guhkes mátki. Earát báhce oađđit. Mun válden álggos čáhcelihtiid, muhto lunttaš logai ahte gal son guoddá daid. Mu mielas son lei dies váccidettiin mu njuoras, ahte viehkalin viežžat govvenapparáhta.  
Márjá muitala, ahte ovttatmano go lunttaš oinnii sus kamera, de álggii son poseret dego mánáin lea dáhpin.
– Mun dadjen  Mihkkal-Máhttii, ahte ii áhkku dáidde válditge gova go don nie dieinnalágiin poseret ja nu dat bijai vácci mu ovddabeal. Dat lei dakkár munno earenoamáš boddu dat.  Márjjás lea áibbas ođđa kamera, muhto vuoitogovas fuolakeahttá son čuoččuha, ahte ii vel máhte geavahit dan riekta. Govven lea su mielas hui somá ja son lávege ollu govvedit.  
– Mun liikon dakkár dilligovaide, govven áhkkubiid, elliid, beatnagiid ja sávzzaid.
Govaid geahčadettiin Márjá muitá dilligovvemiid ja bottuid buorebut.
– Muhto gal dáppe Eanodagas lea vaikko maid, maid sáhttá govvet. Ovdamearkka dihte muorat leat hui fiidnát go daid fal geahččá iešguđet govvenčiegain, muhto ii mus álo leat govvenapparáhta mielde.
Bronssa vuittii Anri Alaoja hui fiinna govainis Gálggojávrris.
– Mu mielas lea dat hui fiinna báiki ja govvahan lea váldon dál suoidnemánus miessemearkuma áigge goas barget ijabeaivvi. Mun liikon juste dalle govvet go beaivváš luoitá lahka almmiravdda, ja dán gova válden golmma-njealje áigge iđđesija. Anri muitala, ahte vuosttaš geardde ii son ožžon govas dakkára mot livččii háliidan, dannego beaivváš speadjalasttii kamerai boastto ládje, muhto viimmat lihkostuvai son iežas mielas bures.
– Mun dadjen Heikiinai, ahte “Vuoi makkár govva šattai! Juste dakkára mun háliidin”.  Anri leige juo háhppehan stuoridit gova ovdal oaččui dieđu das ahte lei boahtán goalmmádin dán gilvvus.  
Silbba dán gilvvus oaččui helssetlaš Hannu Tuominen earenoamáš guoskkaheaddji “Keskiyön taikaa Kilpisjärvellä” –govain, gos gabbaboazu oidnui mierkká čađa.