Suoidnemánu jearahallamis jearaimet, leatgo guoli bivdimis dahkan beare váttis lohpejuŋgela.  64 proseantta vástideddjiin anii guolástanlohpepraktihka  beare váttisin, 31 proseantta fas lei dan mielas ahte guolásteapmi ii leat dahkkon beare váttisin. 5 proseantta vástideddjiin ii máhttán vástidit áššái juá iige já. Ášši kommenteren Fitnodateaiggát-nammamearka mielde stuorámus oassi guolásteddjiin ii oba dieđege makkár lobit dárbbašuvvojit ja danne gáibiditge  ovttaláganvuođa praktihkkii.
”Guolástandikšunmáksu galggašii ollásit váldot eret. Dušše guollečázi eaiggáda lohpi galggašii leat doarvái, dannego juo dasge lea čilgemuš gos sáhttá guolástit ja makkár lobiin.”
Turistafitnodateaiggáda mielas meahcceráđđehus galggašii fállat guollečáziideaset dušše ovttalágan lobiid dannego eai mátkkošteaddjit dieđe sierra lobiid erohusaid. Maiddái nammamearka “Dolgevuoggabivdi” gáibida lohpeáššiide čohkkejuvvon vuogádaga.
”Juohke guolástangoddi vuovdá lobiid iežaset guollečáziide. Movt luli olbmot sáhttet diehtit geas lobiid oažžu, go ii dán dieđe báikkálaš olbmotge. Gal galggašii ovdánahttit čohkkejuvvon vuogádaga, mas guollebivdi mátkkošteaddji oččošii lobi dohko gosa hálida vaikkoba neahta bokte.  Ná galggašii leat, jus juo riekta háliidit guolástanturismma ovddidit Eanodagas.”
Anne Uotila, gii lea leamaš Eanodagas  bivdime guliid, lea lohpepraktihkas seamma linjjáin Turismafitnodatolbmuin ja Dolgevuoggabivdiin. ”Báikkálaš guolástuslobi vuovdi ii leat diehtán gos oažžu bivdit. Son čájehii kárttas eará báikkiid go daid, mat ledje merkejuvvon guolástanbáikin su addin kárttas. Lobi hattinai lei eará go dat mii kárttas čuoččui. Moatti báikkálaš olbmo kommeanttat ledje, ahte ii gánnát lobiid oastit, mannet beare dohko eatnogáddái ja dainna buorre. Dákkár dábálaš turista jáhkká, ahte lobiid vuovdi juobe dieđášii makkár lobiid olmmoš dárbbaša iešguđet čáziide, muhto ná ii nappo leat. “ Nammamearkka Lapponia mielde stáda guolástangoarttain galggašii beassat bivdit buot guollejávrriin ja -jogain. Nammamearka Kustaa fas lei oba ládje suhttan čielggadit gos guolástangottiid rájit, stáda ja priváhta eatnamat, ja lobiid vuovdit oba gávdnojitge Eanodagas. Muhtimat ledje goittotge maid eará oaivilis lohpepraktihka doaibmamis. ”Ii leat váttis rehálaš olbmuide, geat háliidit máksit lobi ovddas”, ná čállá nammamearka “Nuorra guollebivdi”.