Muoná-Eanodaga  álbmotdearvvašvuođabarggu gielddaidovttastumi bátnedikšudilli lea Eanodagas oalle buorre, dannego vástideaddji doavttir Lauri Kyllösa mielde Heahtás lea bátnedoavttir barggus measta olles geasi. Oppalaččat Heahtá bátnedivššus ii leat goittotge nu  buorre vuođđu.
Jus Heahtás ii leat doavttir, de dalle pasieanttaid rávvejit mannat Muonái. Dákkár dili dihte lea váttis meroštallat man jođánit doaktára lusa beassá. Heahtás lea dál sihke bátnedoavttir-  ja bátnedivššárvirgi rabas. Ohcanáigi bátnedivššárvirgái nohká boahtte mánnodaga ja doaktára virgái čakčamánu gaskamuttus.  Kyllösa mielde ollesáigásaš ja guhkesáigásaš bargiide livččii stuora dárbu. Jus bátnedoavttirfáktii ii oaččo oktavuođa Heahtás, de dalle galgá Kyllösa mielde váldit oktavuođa Muonáin.  
– Mii geahččalit dasa ahte unnimusat juogo Muonás dehe Heahtás lea okta doavttir barggus. Kela buhtte mátkki Muonái dalle jus iežasvástidanoassi manná badjel, nu ahte geavatlaččat ovtta fitnamis ii goittotge oaččo jur olus maide.  Maiddái Ruoŧa Gárasavvona bátnedikšu lea Kyllösa mielde okta molssaeaktu jus bátnedoavttirfákta ii gávdno Heahtás ja mátki dohko lea oanehet go Muonái.
Kyllösa mielde Heahtás leat juo guhká čađahan bátnedivššu váilevaš doavttirveagain, ja leat ollu pasieanttat, sihke mánát ja ollesolbmot, geat dárbbašivčče divššu.  Kyllösa mielde lappilaččain ii goittotge leat dáhpin duššiid dihte váidalit jus lea bátnevárka.  – Davi olbmot eai váidal vaikko livččege ollu bániid divvut ja vaikko sii eai oččošege buori bálvalusa. Jus goittotge iežas mielas lea ožžon heajos bálvalusa, de eandalii galggašii dan birra dieđihit ja váldit oktavuođa. Áššit eai rievdat buoret guvlui jus daid birra ii goasse dieđihuvvo.
Ruoŧa Gárasavvona almmolaš bátnedivššus bátnedoavttirdilli lea buorre. Njálbmehygienistta lassin Gárasavvonis lea bátnedoavttir juohke nuppi vahku. Ruoŧa beale ássiid lassin Ruoŧa Gárasavvonii leat bures boahtimat maiddái Suoma beale Gárasavvona olbmot ja gilbbesjávrilaččat.  Heahtá bátnedivššuin Ruoŧa Gárasavvon ii nuge daga ovttasbarggu, muhto dakkár pasieanttaid geat bohtet guhkkeleappos ge Suomas bealde, eai gal siđa eret mannat.