Kela buhtten táksemátkkiid praksis lea rievdan. Dál áigot  goahcat lassánan goluid nu, ahte mátkkiid diŋgojumit čohkkejuvvojit diŋgonguovddážiidda, gos de čohkkejit earenoamážit guhkes táksemátkkiid.  Njuolggobuhtadusortnet lea jagi álggus viidánan ovcci buohccedikšunbiirii, mielde lea maid Lappi ja čavčča 2013 rádjái dát ortnet lea geavahusas olles riikkas.  Njuolggobuhttenortnegis tákse diŋgojuvvo buohccedikšunbiires doaibmi diŋgonfitnodaga telefonnummáris. Dannego kundára mátkediŋgon sáddejuvvo dan táksevuoddjái gii lea lagamusas kundára ja geas lea vuodjinvuorru, de  danin kunddár ii sáhte válljet njuolggobuhtadanortnegis muhtin dihto vuoddji. Jus kunddár ii hálit geavahit  njuolggobuhttenortnega, son sáhttá diŋgot mátkki ieš dan  táksevuoddjis man lea ieš válljen iežas njuolggobuhttenguovllus. Dalle kunddár máksá ieš  táksemátkki olles hatti  ja ohcá buhtadusa Kelas maŋŋel oktan dárbbašlaš mildosiiguin.  Čohkkejuvvon diŋgonortnet dahká vejolažžan elektrovnnalaš dieđusirdima lassin Kela buhtten táksemátkkiid ovttastahttima.  Kundára mátkki eai goittotge ovttastahte, jus dearvvašvuođafuolahusa ovddasteaddji mielas dat ii leat kundára dearvvašvuođadili dáfus vejolaš.  Njuolggobuhttenortnegis kunddár oažžu mátkebuhtadusa juo tákses go čájeha iežas Kela-goartta.  Dieđut mátkki diŋgomis laktojuvvojit njuolga táksemihttáris mátkedáhpáhusdihtui ja dieđut sáddejuvvojit okte beaivvis elektrovnnalaččat Kelai. Dannego mátkebuhtadusaid ožžot dakkaviđe gieđahallamii, de dalle kundára jahkásaš iežasvástooassin jođánit gártá nu gohčoduvvon mátkerádji mii lea sullii 158 evrro.  Njuolggobuhttenortnega ánssus maid oanehis mátkkit rehkenastojuvvojit mielde go čohkkejuvvo ng mátkerádji. De go dat dievvá, Kela sádde kundárii jahkeiežasvástogoartta mearkan das, ahte mátkerádji lea dievvan. Dan maŋŋel kunddár ii dárbbaš máksit mátkki iežasvástooasi.  Jos kunddár ii sáhte geavahit almmolaš fievrruid iežas dearvvašvuođa dihte, lea sus vejolaš oažžut dearvvašvuođafuolahusa ámmátolbmo addán duođaštusa vuoigatvuođas váldit  tákse. Duođaštusa sáhttá dál čállit nu ahte dat lea doaisttážii fámus nappo geavatlaččat dat lea bissovaš iige nu dárbbaš šat sierra duođaštusaid. Kela buhtadan táksemátkkiid sáhttá diŋgot Lappi ja Oarje-Pohja buohccedikšunbiire guovllus nummáris 0200 99 000.