Dán jagi Sámediggi geavaha oasi oahpahusministeriija juolludan earenoamáš doarjagis giellabeassedoibmii Heahtás ja Gárasavvonis, ja doaibma álgáge boahtte vahkus. Árrabajásšaddanjođiheaddji Eila Halmiaisena mielde giellabeassedoibmii leat boahtán dieđiheamit,muhto vel lea doppe sadji.
Gárasavvonis giellabeassi doaibmá golbma beaivvi vahkus. Mánnodagaid ja duorastagaid lea aktivitehta 2-5-jahkásaš mánáide iđđes ovcci rájes diibmu guoktenuppelogi rádjái, ja disdaga leat vuorus eatnit, mánát ja ahkeolbmot diibmu logi rájes moadde diimmu. Gárasavvonis buot golmma beaivve áigge mánáid ja nuoraid giellabeassái sáhttet searvat maid Ruoŧa beale olbmot. Báikki gávnnat rukses viesus, mii lea skuvlašiljus.
Heahtás leat guokte giellabeassebeaivvi. Gaskavahkuid ja bearjadagaid ovccis gaskabeaivái doppe leat 2-5-jahkásaš mánát, ja gaskavahkuid mánáid maŋŋel dohko bohtet eatnit, unnaoappážat ja -vieljažat ja ahkeolbmot. Giellabeassi doaibmá Miessi –nammasaš bearašbeaiveruovttus.
Juohke giellabeassebeaivi sisttisdoallá sámekultuvrii gullevaš doaibmabottu, mii fas sisttisdoallá árbevirolaš bargguid dego omd. boazodoalu, gárvodeami ja biebmokultuvrra. Bottuid leat ovdal dárkilit plánen; luonddus vánddardeapmi ja iešguđetlágan tuvrrat gullet giellabeasi vahkkosaš doibmii. Giellabesiin hupmet sámegiela.
Halmiaisii sáhtát dieđihit e-boasttain eila.halmiainen@enontekio.fi dehe teakstadieđuin telefonnummárii 040 5694 114.