Sámi hábmen-prošeakta lágida sámeduodječájáhusa World Design Capital Helsinki 2012 –prográmma oassin Helssegis golggotmánus 2012, ja dohko ohcet dál sámedujiid.  Sámeguovllu oahpahusguovddáš ja Duodjeinstituhtta čohkkejit sihke árbevirolaš ja ođđa dujiid. Ulbmil lea oažžut duojáriid sihke Suomas ja Norggas searvat čájáhussii dujiideasetguin. Dujiid čájáhussii sáhttá fállat SOG:ii. Duojit čájáhussii válljejuvvojit cuoŋománus, nu ahte dat galget leat Anáris njukčamánu 30. beaivvi rádjái. Sámi hábmen lea Sámi oahpahusguovddáža prošeakta mas Norgga Duodjeinstituhtta  lea ovttasbargoguoibmin. Suoma beale ruhtadeaddjit prošeavttas leat Davvikalohta ráđđi ja Sámi oahpahusguovddáš ja Norgga beale ruhtadeaddjin leat earret eará  Duodjeinstituhtta ja Sámediggi. Čájáhus lea johtti čájáhus, ja dannego Helssega lassin dat čájehuvvo Norggas Harstadas, ja Roavenjárggas ja Anáris Suomas. Ulbmil lea čájáhusa olis lágidit dujiid vuovdinvejolašvuođaid iešguđet dáhpáhusain.